नवी दिल्ली – पाकिस्तानचे परराष्ट्र मंत्री इशाक डार यांनी सांगितले आहे की, भारत-पाकिस्तानमधील शस्त्रसंधी ( ceasefire ) फक्त 18 मे पर्यंतच लागू राहणार आहे. या वक्तव्यानंतर भारत-पाकिस्तान दरम्यान लष्करी संघर्ष पुन्हा सुरू होणार का? हा प्रश्न सर्वत्र उभा राहिला आहे.
इशाक डार यांच्या म्हणण्यानुसार, दोन्ही देशांच्या डीजीएमओ स्तरावरील चर्चा 10 मे पासून सुरू होऊन 18 मे पर्यंत शस्त्रसंधी कायम ठेवण्यावर सहमती झाली. मात्र, राजकीय स्तरावर या सहमतीला मान्यता मिळाल्यावरच ही शस्त्रसंधी कायम राहणार आहे.
विशेष म्हणजे, पाकिस्तानची ही घोषणा भारताला चर्चेच्या टेबलावर आणण्याचा एक धोरणात्मक प्रयत्न असल्याचे विश्लेषकांचे मत आहे. पाकिस्तान सिंधू जलवाटप करारावर चर्चा पुन्हा सुरू करू इच्छित असून, दहशतवादावर भारताकडून हमी मागत आहे. भारताने मात्र स्पष्ट केले आहे की, दहशतवादावर विश्वासार्ह हमी न दिल्यास सिंधू करारावरील स्थगिती कायम राहील.
दरम्यान, दोन्ही देशांमध्ये पुढील चर्चा डीजीएमओ स्तरावरच होणार असून, त्यासाठी भारताने काही अटी ठरवल्या आहेत. या राजकीय खेळामुळे पाकिस्तानच्या सरकारची स्थिती सध्या नाजूक असल्याचे दिसून येते.
